Τρίτη, 10 Νοεμβρίου 2015

..."Πριν ν΄αποθάνω ούλ να λεν Έτον ΓΕΝΟΚΤΟΝΙΑ"...






Εϊ μάνα καλομάνα για πέει με

Ατά έσαν αλήθεια;
Εχάτεψαν τη τεμετέρτς
Κι εκάψανε τ΄οσπίτεα;

Κι επέρανε τον βίον
Το αίμαν και την γην
Και βάσσανα και προσφυγιά
Εσέγγανεν σην ψυν;

Εί ρίζαμ, πούλιμ άξον με
Σ΄ατό την κοινωνίαν
Πολλοί φογούντανεν να λεν:
Ατό εν Ιστορία

Ε! έρθαμε και ετράνηναμ
Σα έμορφα τα μέρεα
Έρθανε κι εκαπάτεψαν
Τη τουσμανή τα χέρεα

Ανθρώπ εσπάζανε τ΄ανθρώπς
Ατό εν αμαρτία
Ετσάιζαν -εβάρκιζαν
Βοήθα Παναΐα

Τραντέλλεναν εσκώτοσαν
Μουρτάρτσαν τη γαρήν ατ
Εφούρκσανεν τη μάναν ατ
Κι επέραν το παιδίν ατ

Εγώ ατά το λέγω σε
Πουλίμ εν Ιστορία
Πριν ν΄αποθάνω ούλ να λεν
Έτον ΓΕΝΟΚΤΟΝΙΑ
.
Ελευθέριος Τακματζίδης
Πόντιες

Δεν υπάρχουν σχόλια:

Δημοσίευση σχολίου